JoomlaTemplates.me by Discount Bluehost

ТААТТАТААҔЫ ЛИЦЕЙ ВЫПУСКНИКТАРЫГАР ТИҺЭХ ЧУОРААН ЛЫҤКЫНААТА

Категория: Новости Опубликовано: 24.09.2019 Автор: Super User

Бу күннэргэ Таатта улууһун оскуолаларыгар үөрэх дьыла түмүктэммитин туоһулуур тиһэх чуораан бырааһынньыга буолан ааста. А.Е.Мординов аатынан Тааттатааҕы лицей выпускниктарын олох киэҥ суолугар атаарар үөрүүлээх тэрээһин П.А.Ойуунускай аатынан Тааттатааҕы народнай театр дьиэтигэр ыытылынна.


Тиһэх чуораан бырааһынньыгын Тааттатааҕы лицей алын кылааһын үөрэнээччилэрэ — 5-с кылаастар эҕэрдэ ырыаларынан астылар. Диктордар сценаҕа 9-с кылааһы бүтэрээри сылдьар оҕолору ыҥыран таһаараллар, үөрэххэ, спорка, общественнай олоххо ситиһиилэрин билиһиннэрэллэр. Салгыы кинилэр кэннилэриттэн лицей быйылгы выпускниктара, гуманитарнай, биолого-химическэй, политехническэй кылаастарын үөрэнээччилэрэ сценаҕа тахсаллар. Кинилэр ортолоругар норуоттар икки ардыларынааҕы, Бүтүн Россиятааҕы, өрөспүүбүлүкэтээҕи, региональнай уонна улуустааҕы олимпиадалар кыайыылаахтара, призердара, араас таһымнаах спортивнай күрэхтэһиилэр чемпионнара, призердара бааллар. Оҕолорго лицей учууталлара «выпускник» лиэнтэлэрин кэтэрдэллэр.

Оскуоланы бүтэрэн, олох киэҥ аартыгар үктэнээри сылдьар выпускниктары лицей директора А.А.Неустроевэҕэрдэлээтэ. «Эһиги инники олоххут бэйэҕит илиигитигэр, барыта бэйэҕититтэн тутулуктаах», — диэн туран, сөптөөх идэни талан, таптыыр үөрэхтэригэр туттарсан киирэллэригэр, оскуолаттан ылбыт билиилэрин өссө чиҥэтэн, инники олохторугар ситиһиилээх буолалларыгар баҕарда. Барыларыгар лицей Бочуотунай грамоталарын, оскуоланы бүтэрэр оҕолор төрөппүттэригэр Махтал суруктары туттартаата.

Улуус дьаһалтатын, баһылык М.М.Соров аатыттан эҕэрдэ тылы улуус баһылыгын солбуйааччы И.А.Сивцева эттэ. Кини: «А.Е.Мординов аатынан лицейи бүтэрэр оҕо билиэхтээх сахаттан бастакы бөлүһүөк кини буоларын, сахаттан аан бастакынан философия наукатын кандидата, доктора буолбутун, аан бастакынан Саха сиригэр университет аһылларын ситиспит киһи буоларын. Авксентий Егорович Тааттатын дьонугар-сэргэтигэр туох улахан өҥөлөөх этэй? Биллэрин курдук 1953 сылтан 1993 сылга диэри Таатта улууһа репрессия содулуттан улахан эрэйи көрбүтэ. Ону ол диэбэккэ, бастатан туран, улууһун аатын көмүскүүр сыалы-соругу туруорунан, 1954 сыллаахха философия наукатын кандидатын аатын көмүскээн, улууһун өрө таһаарбыта. Иккиһинэн, историк Г.П.Башарин үс саха реалист-суруйааччытыгар аналлаах үлэтин көмүскүүрүгэр кыах биэрэн, көмөлөһөн, улууһун үтүө аатын көмүскээбитэ. Онон эһиги, бүгүҥҥү выпускниктар кини тэлбит суолунан салгыы билии киэҥ аартыгын дабайыҥ, киһи буолан килбэйиҥ, саха буолан сандаарыҥ», — диэн туран, 9-с кылаас үөрэнээччилэригэр Ариан Боппосвка, Анастасия Винокуроваҕа уо.д.а. улуус баһылыгын Бочуотунай грамоталарын, оскуоланы бүтэрэр оҕолор төрөппүттэригэр Махтал суруктары туттарда.

Таатта нэһилиэгин баһылыга Е.И.Павлов, улуустааҕы үөрэх управлениетын бэрэстэбиитэлэ В.И.Колодезникова, оҕо спортивнай оскуолатын директора Е.Е.Ноенохов эҕэрдэлээтилэр, үөрэх, спорт бастыҥнарыгар наҕараадалары туттардылар. Улуустааҕы культура управлениетын начальнига Г.Г.Вырдылин эҕэрдэ тылын тиэрдэн туран,Саргылаана Саввинаҕа, Айаал Посельскайга, Матвей Турниҥҥа уо.д.а. СӨ Культураҕа министерствотын Махтал суруктарын, Таатта-Чурапчы военкома Н.М.Андреев байыаннай-патриотическай иитиигэ ситиһиилэрин иһин учуутал Н.Н.Блахировка РФ Оборонаҕа министерствотын мэтээлин, «Снежный барс» көрүү-куонкурус бастыҥнарыгар грамоталары, «Ситик» оҕо тэрилтэтин салайааччыта М.Д.Алексеева уонна кини иитиллээччилэрэ иитиллээччилэрин уонна аҕа саастаах доҕотторун оскуоланы бүтэрэн, олох киэҥ аартыгар үктэнэр үөрүүлээх күннэринэн эҕэрдэлээн туран, грамоталары, өйдөбүнньүк бэлэхтэрин туттардылар.

Үөрүүлээх тэрээһин кэмигэр үгүс үтүө тыл этилиннэ, оскуоланы бүтэрээччилэргэ алгыс тыл бастыҥа ананна, элбэх наҕараада туттарылынна. Оскуоланы бүтэрээччилэр 11 сыллаах үөрэхтэрин түмүктүүр тиһэх чуорааны тыаһатар чиэс лицей 5-с «б» кылааһын үөрэнээччитэ Саргы Ниморицынаҕа уонна 11-с «б» кылаас бастыҥ үөрэнээччитэ Максим Слепцовка тигистэ. Тэрээһини оскуоланы бүтэрээччилэр «Быраһаай, оскуолам!» ырыанан түмүктээтилэр уонна махталларын бэлиэтигэр үөрэппит учууталларыгар сибэкки дьөрбөлөрүн туттардылар. Ити курдук оскуоланы бүтэрээччилэри олох киэҥ суолугар, алгыстаах айан аартыгар атаарар тиһэх чуораан лыҥкыныы тыаһаата.

Просмотров: 49