JoomlaTemplates.me by Discount Bluehost

"ПЕТРОВСКАЙ ААҔЫЫЛАР" КЭМПИРИЭНСИЙЭ

Категория: Новости Опубликовано: 24.09.2019 Автор: Super User

Албан Аат орден толору кавалера, таатталар биир дойдулаахтара Дмитрий Ананьевич Петров аатын сүгэр Ытык Күөл 2№-дээх орто оскуолатыгар ХVII төгүлүн ыытыллар «Петровскай ааҕыыларга» Чурапчы уонна Таатта улуустарыттан 230-н тахса оҕо кытынна. Илин эҥэр улуустарыгар анаммыт тэрээһин сылын аайы хабар эйгэтэ кэҥээн иһэр.


Кэмпириэнсийэҕэ Таатта улууһуттан Ытык Күөл оскуолалара бары, Дьохсоҕон, Чымынаайы,Чөркөөх, Тыараһа, Туора Күөл, Даайа Амма, Уолба, «Сатабыл» оҕо айымньытын сайыннарар эбии үөрэхтээһин киинэ, Чурапчыттан Болтоҥо оскуолатын 3-11 кылаастар үөрэнээччилэрэ кэлбиттэр. Конференцияҕа кыттыбыт оҕолор 8 компетенцияҕа чахчы сатабыллаахтарын, дьоҕурдаахтарын көрдөрдүлэр.

Конференцияҕа «Таатта улууһа» муниципальнай оройуон баһылыга Михаил Михайлович Соров оҕолорго дириҥ ис хоһоонноох истиҥ эҕэрдэтин тиэртэ. Үөрэҕирии улуустааҕы салалтатыттан начальнигы солбуйааччы Мира Николаевна Луковцева, Таатта нэһилиэгин баһылыга Егор Иннокентьевич Павлов, оскуола дириэктэрэ Дмитрий Вячеславович Сергеев тыл эттилэр. Оскуола үҥкүүһүт кыргыттара «Сир симэҕэ» диэн үҥкүүнү анаабыттара дохсун ытыс тыаһынан бэлиэтэннэ.

Оҕолор Дмитрий Ананьевич төрөөбүт алааһыгар Иитимээйигэ Таастаахха пневматическай саанан сыал ытыытыгар, көс кэриҥэ сиргэ сүүрүүнэн бардылар. «Сулустаах эстафетаҕа» сэттэ хамаанда кытынна. Ытык Күөлгэ Кыайыы болуоссатыгар Албан аат фронтовигын, сэрии уонна тыыл ветераннарыгар анаммыт пааматынньыктарга сүгүрүйэн аастылар. Аҕа дойду көмүскэлигэр тыыннарын толук уурбут, эйэлээх олох туһугар турууласпыт дьоммутугар сүгүрүйүү, махтал бэлиэтэ ытык тэрээһиммит.

63 худуоһунньук оҕо сэрии тиэмэтигэр араас ньымаларынан үс чаас устата тута уруһуйдаан көрдөрдүлэр. Пластилинынан сэрии бойобуой техникаларын макетын тутатына оҥорон көрдөрүүгэ элбэх оҕо умсугуйан туран кытынна.

                                                          

 

Компьютерынан үлэлэргэ киинэлэри, презентациялары көрдөрдүлэр. Бу хайысхаҕа Дьохсоҕон 6-с кылааһын үөрэнээччилэрэ бэйэлэрэ оонньообут киинэлэрин, устубут мультфильмнэрин көрдөрөн бастаатылар. Икки кылааска эмиэ ити кэм устатыгар сүүсчэкэ оҕо тутатына бэриллибит тиэмэҕэ өйтөн сахалыы суруйууга күөн былдьастылар. Маны сэргэ хоһоон ааҕыытыгар, оҕолор эһэлэрэ сэриигэ кыттыыларын, эбэлэрэ тыылга бэриниилээх үлэлэрин туһунан киэн тутта кэпсээбиттэрин улахан да дьон, оҕолор бэркэ сэҥээрэн иһиттилэр.

айыаннай-патриотическай тиэмэни таарыйар нууччалыы тылынан өйтөн суруйуу бэрт көдьүүстээхтик ыытылынна. Оҕолор ааҕааччы, истээччи уйадыйар сюжеттарын иэйэн туран суруйбуттар. Гран-при кыайыылааҕынан Ытык Күөл 2 №-дээх оскуолатын 9-с кылааһын үөрэнээччитэ Александр Нохсоров дириҥ ис хоһоонноох, биир да сыыһата суох үлэтинэн буолла.

Конференция түмүгэр тэрээһин кыттыылаахтара сыаналаах бэлэхтэри, грамоталары, анал ааттары туттулар. «Уруйдан улуу кыайыы» секцияҕа Чөркөөх оскуолатыттан Таисия Новгородова (7 кылаас) уонна Рада Харитонова (5 кылаас) эбэлэрэ Чурапчы көһөрүллүүтүгэр кыттыытын туһунан дакылааты ааҕан 1-кы миэстэ буоллулар.

 

Сыал ытыытыгар бастакы миэстэҕэ Кыйы, 2-кэ Чымынаайы, 3-кэ Ытык Күөл 1№ оскуолатын үөрэнээччилэрэ таҕыстылар. Биирдиилээн ытааччыларга кыайыылаах Иван Литвинцев хаһыс да төгүлүн тэҥнээҕин булбата. Кыргыттарга кыайыылааҕынан Ытык Күөл 1№ орто оскуолаттан Нария Лазарева буолла. «Сулустаах эстафетаҕа» олохтоох оскуола 8-11 кылаастарыттан хамаандата инникилээтэ. Петровтар дьиэ кэргэн туруорбут бириистэригэр күрэхтэһиигэ 287 очколаах Тыараһа оскуолата бастаата.
Уһаныыга күрэхтэһии быйыл иккис төгүлүн ыытылынна. Конференция саамай элбэх оҕолоох секциятынан уруһуй буолла.

«Петровскай ааҕыылар» оҕолорго ийэ дойдуга тапталы, бэриниилээх буолууну иҥэриигэ, хорсун быһыыны оҥорууга, олоҕу таптыырга патриотическай тыыны үөскэтиигэ көдьүүстээҕэ өссө төгүл бигэргэннэ.

Просмотров: 39